Qostanaıda ótken «Kostanay Invest–2017» ınvestısııalyq forýmyna shetelderden bıznes qurylym, dıplomatııalyq korpýs, ınvestısııalyq kompanııa ókilderi, sheteldik jáne otandyq sarapshylar, kásipkerler, Qazaqstan Úkimetiniń músheleri, memlekettik jáne ulttyq kompanııa qyzmetkerleri, Parlament depýtattary, barlyǵy 250 adam qatysty.
Forýmda Qostanaı oblysy ákiminiń orynbasary Meıirjan Myrzalıev óńirdiń ınvestısııalyq áleýeti jóninde aıtyp berdi. Ol aldymen jurtttyń nazaryn oblystaǵy ınvestısııa tartý kórsetkishine aýdardy. Bıyl jyl basynan bergi 8 aıda oblystaǵy negizgi kapıtalǵa 113 mıllıard teńge ınvestısııa tartylǵan. Bul ótken jyldyń osy merzimimen salystyrǵanda 11,5 mıllıard teńgege kóp.
«Oblystaǵy óńdeý ónerkásibine salynǵan ınvestısııa kólemi 2,2 ese ósti. Munyń syrtynda 285 mıllıard teńgeni quraıtyn 16 iri joba júzege asyrylýda, onda 2 myń jumys orny ashyldy» dedi Meıirjan Uıabaıuly.
Forýmda Investısııa jáne damý vıse-mınıstri Erlan Haırov, Mádenıet jáne sport vıse-mınıstri Asqar Batalov, Aýyl sharýashylyǵy mınıstrliginiń jaýapty hatshysy Ermek Kósherbaev, Dúnıejúzi bankiniń jeke menshik sektordy damytý mamany Eraly Beksultan, Azııa damý banki ókildiginiń dırektory Djovannı Kapanellı, taǵy basqalar sóılep, Qazaqstandaǵy ınvestısııalyq qolaılylyq jáne ınvestısııa tartýdyń máselelerin ortaǵa saldy.
Forýmnyń plenarlyq májilisin oblys ákimi Arhımed Muhambetov qorytyndylap, onyń jumysyna qatysqandarǵa rahmet aıtty. Plenarlyq májilisten keıin áleýetti ınvestorlar men Qostanaı oblysy arasynda 26 memorandýmǵa qol qoıyldy.
Názıra Járimbet,
«Egemen Qazaqstan»
QOSTANAI